انت هنا في: الرئيسية المكتبة المقروءة شعر كتابي (دوزنات ) عيدية - شعر : هاشم صديق

موقع الشاعر هاشم صديق

 (هدية العيد ) مونتاج شعري

 (دوزنات ) عيدية

 ( طبعة جديدة )

  شعر : هاشم صديق

 (1) 

بديتِك
أَلِف
با
تا .
ودوزنتك
دو
ري
مى
فا .
...........

ملصت أسايا
في عتبة
سلام بابِك
مشيت من فوق
بُساط  وجدِك
هسيس وحَفَا
وإتمددت في لِحاف
حِنّيتِك المعطونة
في الصندل
( ونُمت قَفَا ) .
..............
كل ما شربت
من نبعِك
أصير عطشان
ولا قلتي
حبيبي كفاك
ولا قلت
حبيبتي رِوِيت
روحي كفا .
.............
من سُنبل
عذاب الناس
طحنتي
عجنتي
خبزتي
كعك أفراح
لحُزن العيد
ما رشّيتي
من فوق الخبيز
سُكّر
ولا نكهة مِسِك
أو قِرفة
أو عنبر
ولا ضردرتي
من فوقو
الملح تجديد.
خليتي الطعم خاطرة
عن يوماً
عسل جايي
قريب وجديد .
..............
بديتك نقشة
في صفحة
ضمير إحساس
وإتلبّشْت
دقيت ليكِ
في ( الحضرة )
طبول عِشِقك
و ( رِق ) ونحاس .
يا مجنونة زي جِني
لقيتك طافية
فوق الغيم
وكف بِلْوي
إيدين الضيم
وينافحِ
عن جروح الناس .
وحال مرجيحة
من رؤية
تجادل
( واقع الدنيا )
ترازي
تزازي
بين ( سين ) ( جيم )
تبارز
آفة التكميم
تسامر
في مسام الراس
.............
لِقيتك
في زمن خاين
مظلة هميمة
من إخلاص .
..............
بديتك فكرة
في تطريز
طرف منديل
وكَبّيتك
صَبُر شافي
علي جروح
البلد والنيل .
يا مجنونة
زي جِني
رسمنا
علي ( شَكْل )
الوطن
تعديل
رجّعنا الجنوب
لشمال
بصمنا نَشِد
صبُر وآمال
ونغيّر
لواقع الحال
وما نبني الحِلِم
في مجري
درْب السيل
ويعود بلداً
نبيل وجميل
كبير وأصيل
مليون ميل .
..............
( وأقول ليك
الكلام الجد
هواكْ جوايا
فاض بالجد
أخير يا روحي
نفتح  سد ) .
...........
وأقول ليك
كلام غُبني
وحراق الروح ؟
بلد باتت
خريطه جروح
خايف يجي اليوم
التموت واقفه
ومن إيدينا تمشي
تروح .
تعالي نهاتي
 لي مصباح
ونْرَجّع
زمان الصاح
نَنَزِل
خيمه الأتراح
ونرفع
خيمه للأفراح .
............
بديتك وردة
في عِروة
وهرولت
ما بين ( صفاكِ )
حنين
وبين
تعريشة ( المَروه )
دفرت تَغَا الرياح
أحميك
بقيت ساتر
بقيت ( ضروه ) .
..............
وتْخُتي رحلك
في رمال قفري
أصير واحه
وسلام راحه
وسيف
ينقز علي الساحة
وأفَتِّح
في صباح بدري
علي وطناً
بديع  دوغري
ربط  بيناتنا
بي ( حبلاً )
حميم ( سِري ) .
............
بديتك همسة
في آذان
جبال توتيل
ولوّنتِك
صفق إكليل
علي راس البلد
والنيل
نسجتك توب
نهار أبيض
أصيل التيل
ونَصّبتِك
فَرَاش أزرق
يرفرف
في نخل قونديل
وتميتك
سرِج من نور
علي صهوة
أصيل الخيل
.............
بديتك
أَلِف
با
تا .
ودوزنتك
دو
ري
مي
فا
.............
ملصت أسايا
في عتبة
سلام بابِك
مشيت
من فوق
بساط وجدك
هسيس وحَفَا
إتمددت في لْحاف
حِنِيِتِك المعطونة
في الصندل
(ونُمت قفا ) .
...........
 (2)
أتجاهل
حنيني إليك
أخاف يمكن
يجيبني إليك
أنا الضايق
جَمُر غيرك
أشوف شيتاً
عصرني عليكْ
تقول مطراً هَطَل
دقّاني في السكه
جريت بي حيلي
لي بابك
أقول أتضارا
واتْدفّا
أقول يمكن
بِنيّه أصيله
زي خيلاً
وصل بي زفّه
للفّه
وجيت كايس
أمان حُضنك
ودار عينيك
........
أخاف منك
وأنا العاشقك
وباقي عليك .
..........
(3)
اذا فقدك
طفر دمعه
يسيل حزنك
معاى جدول
على خدين
نشيج شمعه
........
كأني معاك
كأني عِرِفت
نور محياكِ
من بدري
كأني سكنت
في رمشك
ولا تدرى
مستغرب، وما محتج
شنو النقشك
على دربي؟!
منو الشتلك
على سمعى
وعلى بصرى؟!
........
شنو الخلاّك
ترشي خَلاىَ
بي مطرك
واحس في جِلْدِي
مس برقك
وفي جيدي
اندرع شالك؟!
.........
شنو الرسمك
على الخاطر
ليوم باكر
منو الكتبك
شنو الجابك؟!
........
يا... قدري .
.........
(4)
جيت من بدري
لو تدري
على بابك
بدون أدرى
........
نَقَرْت
بحيل جَمُر مطلوق
فتحت زرار
قميص الشوق
لفحني الصندل
المحروق
ساح همسك
على سدري
رجف إسمك
على ثغري
باس نارك
بدون يدري.
فتح للقاكِ
كم كبري
واتْجمّع
صبح ساقين
علي برِّك
نزح يجري.
وإتفتّح
صبح إيدين
قَلَد حُضنك
رَكَن ليهو
سكن فيهو
من ضُهريه
لي عصريه
للفجري .
........
(5)
مساك قمراً نزل
في ( سيره)
في أمدرمان
( رتينه ) إتقالدت
مُبخر(بخورتيمان)
تلاوة
في حلقة للقرآن
سلام في صوت
نِدَا الآذان
ضحك بلل شغاف
حِبّان
........
مساكْ
بحة حنين وحنان
غنوه نبيلة
للأوطان.

 
فارماس ... هو شخصية الشاعر و المغنى
 الذى يرمز للثورة فى مسرحية نبتة حبيبتى
وهو الذى إستطاع أن يغيِّر عادة ذبح الملوك
بالشكل الإنقلابى التى كانت تتم فى
الأسطورة القديمة وفى المسرحية
على السواء...
وهو فى النهاية يرمز إلى الإبداع فى
تغيير الوعى وتفجير الثورة وتغيير
النظم السياسية المستبدة

شـــــــــــرف الكـــــــــلام

أنا المديت شراع أفكاري
  في بحر الزمان تهت
طويت الدنيا بالأفكار
محل ما تميل أكون ملت
من الغالي وعظيم القول
 كتير مديت ايدي شلت
وشان الكلمة شرف الرب
وشان الناس تحس تطرب
وقفت أنادي في الأزمان
طهارة الكلمة في الفنان
وصدق الحرف في صدقو
وحصاد اجيالنا في شتلو
ولو داس الشرف خانو
قلوب الناس تسد الباب
تعاند طبلو والحانو

إحصاءات

زيارات مشاهدة المحتوى : 3650196

المتواجدون حاليا

يوجد حاليا 89 زوار المتواجدين الآن بالموقع
{jatabs type="modules" animType="animMoveHor" style="trona" position="top" widthTabs="120" heightTabs="31" width="100%" height="auto" mouseType="click" duration="1000" module="ja-tabs" }{/jatabs}