انت هنا في: الرئيسية المكتبة المقروءة مقالات وتحليلات اقـــــــــــوال

موقع الشاعر هاشم صديق

اقـــــــــــوال

( طبعة ثالثة )

 

مشهد درامي

 

( الزوج منهمك في حل الكلمات المتقاطعة ... والزوجة تراقبه باهتمام )

 

الزوج  : ( يحدث نفسه في ضيق ) أبت تجي .

الزوجة : شنو ؟

الزوج  : وزير سابق من عشرة حروف .. في حرفين منهم .. ألف وجيم

الزوجة : وزير سابق ؟

الزوج  : ايوه

الزوجة : في ياتو حكومة ؟

الزوج  : ما موضحين

الزوجة : زمن نميري ... ولا الصادق ... ولا حسه ؟

الزوج  : بس كاتبين وزير سابق

الزوجة : البلد دي كلها وزراء سابقين

الزوج  : ( يضحك ) كلامك صاح ... علي الاقل كانوا يوضحوا في ياتو عهد ... او 

            ياتو حكومة

الزوجة : ( برغبة واهتمام في المشاركة ) كدي شوف باقي الكلمات .

الزوج  : ( يعود للصحيفة ) وباء ... من سته حروف ... في حرفين منهم ...

الزوجة : ( تقاطعه بسرعة ) دي ما ياها القشاريا

الزوج  : ( يضحك ) ايوه ياها الملاريا .. دي ساهلة ( يعود للتركيز في الصحيفة)

          لاعب كرة يشمله فك التسجيلات هذا الموسم ... يلعب لفريق عاصمي كبير

الزوجة : من كم حرف ؟!

الزوج  : سبعه حروف ... حرفين منهم في بداية الاسم ... نون والف

الزوجة : ( تصيح فرحة وكأنها وصلت للحل الصحيح ) نادر خضر

الزوج  : ( مغتاظاً يضع الصحيفة جانباً ) منو ؟

الزوجة : نادر خضر

الزوج  : ( ساخراً ) عليك الله نادر خضر لاعب كورة وبشملو فك التسجيلات

الزوجة : ( مستدركه ) لا استغفر الله ... نادر خضر وزير حالي

الزوج  : (ضائقاً ) يا وليه ... نادر خضر ... مطرب ... بغني ...

الزوجة : ( تتذكر ) آي صحي ... معليش

الزوج  : ( مغتاظاً ) انا ما عارف ليه ما عملوا فك تسجيلات للزوجات كمان...   

           عشان  نرتاح .

الزوجة : (تضحك ) عليك الله يا عادل ... كان عملوا فك تسجيلات للزوجات ...

             بتفكني .

الزوج  : عكس الهوا  طوالي

الزوجة : لا عليك الله ... جد بتفك تسجيلي ..؟!

الزوج  : ( محاولاً تأكيد الجدية ) باسرع فرصة .

الزوجة : ( محاولة اغاظته ) طيب ببقي حرة ... وبعرس راجل تاني

الزوج  : عرسي

الزوجة : ما بتزعل ..؟

الزوج  : ( يحاول تمثيل الاصرار ) لا .. ازعل ليه ؟

الزوجة : ما بتجي يوم عرسي تبكي وتغني في الليلة ديك ؟

الزوج  : لا

الزوجة : ولا بتجعر وتغني حان الزفاف ؟

الزوج  : ابداً

الزوجة : ولا بتغني النهاية ؟

الزوج  : ولا بغني لو كنت ناكر للهوي زيك

الزوجة : عليك الله يا عادل ؟

الزوج  : ايوه

الزوجة : ( تبدو وكأنها اخذت المسألة بجدية ) يخسي عليك يا عادل .. تهون عليك 

             العُشرة ؟

الزوج  : ( سارحاً ) وانتي يهون عليك المريخ ؟

الزوجة : شنو ؟

الزوج  : ( مستدركاً ) لا .. اقصد .. ما تبقي ..خليها تهون ..

الزوجة : ( محاولة استدرار عطفه ) انت ذاتك ما بتقدر .. كضاب .. عارفاك .. لا 

            بتفك تسجيلي ولا حاجة .. اصلك ما بتقدر تعيش من غيري ... بتريدني

            موت ...

الزوج  : القال ليك منو ؟

الزوجة : انت ذاتك ... طوالي بتقول ما بتقدر تعيش من غيري .

الزوج  : ( جاداً ويبدو ان الموضوع قد تقمصه ) ده كان زمان ... قبال فك  

            التسجيلات

الزوجة : شنو ؟

الزوج  : ( باصرار ) ايوه ... كان ده قبلما ما تتمي المدة القانونية

الزوجة : ( باكية ) عليك الله انا تميت المدة القانونية ؟

الزوج  : ايوه تميتي خمسه سنوات

الزوجة : ( تنفجر باكية ) يخسي عليك يا عادل (يفتح الباب ... يدخل والد الزوجة 

             ويبدو انه غاضب ومتوتر من شىء ما )

الاب    : ( مندهشاً ) مالك ءانتي يابت كمان

الزوجة : يابا .. عادل قال أنا تميت المدة القانونية .. وحيفك تسجيلي

الاب    : ( منفعلاً ) الكلام ده حصل يا ولد ؟

الزوج  : ايوه .. تمت المدة القانونية .. وحا أفك تسجيلها

 

 

 

الاب    : (منفعلاً بجدية ) مش كفاية انا جايي حسع من الكورة والمريخ انسحب ... 

            اجي القاك كمان عايز تفك تسجيل بتي .. بتي قعدت معاك خمسه سنين .. 

            وجبت منها ولدين  .. تفك تسجيلها تمشي وين بعد ده ؟!

الزوج  : ( بانفعال يهتف ) الليق ... الليق الليق يا عواليق ... الليق الليق يا عواليق .

 
فارماس ... هو شخصية الشاعر و المغنى
 الذى يرمز للثورة فى مسرحية نبتة حبيبتى
وهو الذى إستطاع أن يغيِّر عادة ذبح الملوك
بالشكل الإنقلابى التى كانت تتم فى
الأسطورة القديمة وفى المسرحية
على السواء...
وهو فى النهاية يرمز إلى الإبداع فى
تغيير الوعى وتفجير الثورة وتغيير
النظم السياسية المستبدة

شـــــــــــرف الكـــــــــلام

أنا المديت شراع أفكاري
  في بحر الزمان تهت
طويت الدنيا بالأفكار
محل ما تميل أكون ملت
من الغالي وعظيم القول
 كتير مديت ايدي شلت
وشان الكلمة شرف الرب
وشان الناس تحس تطرب
وقفت أنادي في الأزمان
طهارة الكلمة في الفنان
وصدق الحرف في صدقو
وحصاد اجيالنا في شتلو
ولو داس الشرف خانو
قلوب الناس تسد الباب
تعاند طبلو والحانو

إحصاءات

زيارات مشاهدة المحتوى : 5078169

المتواجدون حاليا

يوجد حاليا 99 زوار المتواجدين الآن بالموقع
{jatabs type="modules" animType="animMoveHor" style="trona" position="top" widthTabs="120" heightTabs="31" width="100%" height="auto" mouseType="click" duration="1000" module="ja-tabs" }{/jatabs}