موقع الشاعر هاشم صديق

وقلت يا أقدر أقول أوصافى فيها 

او أصوم من الكتابة. 



حاولت أرسُم ضَحْحَتَها 

كل ما أحَنِّس فى الحروف 

ألقاها تابا

و حاولت تانِى 

بديت أعيد رسم الحروف 

إصرارى؟!..لا لا 

ريدى ليها الطاغى جابها 

وفرحت لامِن دمعة رَقَشَت 

وخُفتَ تنزل 

وللخطوط تَمسَح تَبَدِّل 

وَقَفتَ حيلى بعيد مشيت 

قَبَّلتَ تانى رجعت جيت. 

زِدت الخطوط عايَنْت فيَها 

لقيت نجم شَعّ وْحَضَن 

وردة بَنَفسج جوّه غابة. 

وكلمة احبك فى الفروع 

مكتوبة بى صدق الغلابة. 

وكوخ مَحَكّر فى القمر 

قلبى البِرِيد لى بابو شابا 


وفكرت تلت الليل أفسّر 

وين جمال ضحكة عيونها 

وين؟وين؟ وهل..؟ 

وهل أحرف كلامى الفيها دونها؟ 

وحاولت تانى 

ومن جديد سِخَت الحروف 

زدت الخطوط اكتر كمان 

بَسَمت عيون السمحه 

من وسط السطور 

وشوَيّه من الدايرو بان. 

وبديت أزيد...

ومرات اعدِّل 

ولما ألقىَ وَصِف جديد 

أفرح واقيف فى الساحه أقدِل. 

وفى النهاية لقيت عيونها

والبَرِيق الزى شموس

حَاضِن سنونها. 

والخدود والجيد... 

وخصلاتها 

البِزِيد غزل النسايم فى جِنونها 

كلهن ضاحكين 

بتَاوقوا من القصيدة 

إلإ آه أنا من حروفى الفيها عاجزة 

كل الكتبتُو

محال يكون أبيات جديدة 

محال يكون أبيات جديدة 

يناير 1974